Ads are placed to support costs of domain and hosting. All Ads are random and are not chosen by Nohay Lyrics: Sorry for any inappropriate ads.

Chehlum Jo Karbala May – Marsiya

Chehlum jo karbala may bahattar ka ho chuka

paywand bekason ke tan o sar ka ho chuka

aur fateha hussain ke lashkar ka ho chuka

qabron pa shor aal e payambar ka ho chuka

      maatam may teen roz rahe shor o shain se

      roye lipat lipat ke mazaar e hussain se

misle charaagh gor e ghareeban pa dil jalaye

phoolon ke badle khabron pe laqte jigar chadhaye

pyaron ki bood o baash ke saaman jo yaad aaye

be saaqtha pukaari kaleja pakad ke haaye

      hai hai wo parda daar hamare kidhar gaye

      be parda hoke aale nabi dar badar gaye

maqtal ke aas paas ye bewon ki thi fughaan

zainab jabeen lahad pa dhare karthi thi bayan

ay mere karbalayi baradar hussain jaan

hamsheer teen din se tumhari hai mehmaan

      allah meri baat bhi poochi na aap ne

      zindaan ki waaredaat bhi poochi na aap ne

raazi hoon jo riza e imam e jaleel hai

par khaabil e mulaaheza baazu ka neel hai

na koi daa rass hai na koi kafeel hai

bhai baghair aap ke zainab zaleel hai

      pusht o panaah uth gaya be-khanuman huwi

      dekho ye pusht khaabil e noke sina huwi

marjaye sab yateemon ke sar par rahoon jo mai

bachpan may unki qald ki eezaa sahoon to mai

bahlane ko tumhari kahani kahoon to mai

maa hoon to mai phupi hoon to mai baap hoon to mai

      inka bhi daagh aaj milay yaake kal milay

      aise nahi naseeb ke qidmath ka phal milay

mai jaanthi thi shehr basa hoga bhai ka

hoga hujoom qabr pa saari khudaai ka

chehlum karoongi dhoom se mai karbalayi ka

pursa bhi yaan koi nahi zehra ki jaayi ka

      moo dhaampne ko aap hi palla bhi leti hoo

      aur apne dil ko aap hi pursa bhi deti hoo

chehlum to kar chuki mai dilafgaar ya hussain

ab rauza kis tarha se ho tayyar ya hussain

beta bhi aur bahan bhi hai naadar ya hussain

aakhir kabhi to aayenge zawwar ya hussain

      takya hai kaar saaziye parwardigaar par

      is dam ko saayeban bhi nahi hai mazaar par

hone laga sawaar rasaala basheer ka

danka baja haram ke waidaa e aqeer ka

qaima utha lahed se shah e mashraqain ka

aur sab tabarrukaat jaab e ameer ka

      turbat ke gird oont barabar khade huwe

      ruqsath ko jama qabr pa chote bade huwe

zainab pukaari kooch ka saaman hogaya

phir shehr mere bhai ka veeran hogaya

aur maqbera hussain ka sunsaan hogaya

hoo ka maqaam qatl ka maidan hogaya

      aayi musaafiron ko mere wo zameen pasand

      dunya may jis zameen ko basti nahi pasand

ay karbala e sarwar e dilgeer alweda

ay qatlgaah e hazrath e shabbir alweda

ay qabr e ibne saaheb e tathheer alweda

ay bhai jaan jaathi hai hamsheer alweda

      kya be-naseeb hai ye nawasi rasool ki

      tum ne mujaweri na hamari qubool ki

bhaiya utho kajawe may mujh ko tumhi bithao

bhaiya mai be naqaab hoo rehgiron ko hatao

rokein qanaath akbar o abbas ko bulaao

khaali hai godh bhabhi ki asghar ko lete aao

      sardaar saare khaafele ke aage hote hai

      tayyar kaarwaan huwa aur aap sote hai

kab se tumhe pukaar rahi hoo mai qastha tan

hae hae jawaab bhi nahi dete shah e zaman

bhaiya gale laga loon to jaaun suye watan

aayi nida sidhaaro khuda haafiz ay bahan

      sughra ko meri simth se bhi pyar kijiyo

      hoga sawaab khaatir e beemar kijiyo

Leave a Reply

error: Content is protected By the Owner of Nohay Lyrics !!